திருப்பாவை

திருப்பாவை-1

மார்கழித் திங்கள் மதிநிறைந்த நன்னாளால்;
நீராடப் போதுவீர்! போதுமினோ, நேரிழையீர்!
சீர்மல்கும் ஆய்ப்பாடிச் செல்வச் சிறுமீர்காள்!
கூர்வேல் கொடுந்தொழிலன் நந்தகோபன் குமரன்,
ஏரார்ந்த கண்ணி யசோதை இளஞ்சிங்கம்,
கார்மேனிச் செங்கண் கதிர்மதியம் போல்முகத்தான்
நாராயணனே, நமக்கே பறைதருவான்,
பாரோர் புகழப் படிந்தேலோ ரெம்பாவாய்.
பொருள்-
மார்கழி மாதம் பெளர்ணமி நாள் இது.
குளிக்க வரவிரும்புகின்றவர்களே! ஆபரணங்களை அணிந்தவர்களே!
செல்வம் நிறைந்துள்ள திருவாய்ப்பாடியில் இருக்கும் இளம் பெண்களே வாருங்கள்
கூர்மையான வேலைக் கொண்டு தீங்கு செய்பவருக்குத் கொடியவனான, நந்தகோபனின் பிள்ளை,
அழகான கண்களுடைய யசோதையின் சிங்கக் குட்டி,
மேகம் போல உடல், சிவந்த கண்,
சூரியசந்திரனை போல முகம் முகம் கொண்டநாராயணன்
நாம் விரும்பியதை கொடுப்பான்;
உலகம் புகழப் பாவை நோன்பில் ஈடுபடலாம் வாருங்கள்.



திருப்பாவை - 2

வையத்து வாழ்வீர்காள்! நாமும் நம்பாவைக்குச்
செய்யுங் கிரிசைகள் கேளீரோ! பாற்கடலுள்
பையத் துயின்ற பரமன் அடிபாடி,
நெய்யுண்ணோம்; பாலுண்ணோம்; நாட்காலை நீராடி
மையிட் டெழுதோம்; மலரிட்டு நாம் முடியோம்;
செய்யா தனசெய்யோம்; தீக்குறளைச் சென்றோதோம்;
ஐயமும் பிச்சையும் ஆந்தனையும் கைகாட்டி
உய்யுமா றெண்ணி உகந்தேலோ ரெம்பாவாய்.

பொருள்-

பூமியில் வாழ்பவர்களே நம்முடைய பாவை நோன்புக்குசெய்ய வேண்டிய காரியங்களைக் கேளுங்கள்!
பாற்கடலில் உறங்குகிற பகவானுடைய திருவடிகளை பாடுவோம்.
நெய், பால் இவற்றை உட்கொள்ளமாட்டோம்.
விடியற்காலை குளித்துவிட்டு, கண்ணுக்கு மை கிடையாது, கூந்தலுக்கு மலர் கிடையாது.
செய்யக்கூடாத காரியங்களைச் செய்யமாட்டோம். கோள் சொல்லமாட்டோம்.
தானத்தையும் பிச்சையையும் எங்களால் முடிந்த வரை கொடுப்போம்.
இப்படிப் பிழைக்கும் வழியை எண்ணி சந்தோஷப்படுவது நம் பாவை நோன்பு.



திருப்பாவை - 3

ஓங்கி உலகளந்த உத்தமன் பேர்பாடி
நாங்கள் நம் பாவைக்குச் சாற்றிநீர் ஆடினால்,
தீங்கின்றி நாடெல்லாம் திங்கள்மும் மாரிபெய்து
ஓங்கு பெருஞ்செந்நெ லூடு கயல் உகளப்
பூங்குவளைப் போதில் பொறிவண்டு கண்படுப்ப,
தேங்காதே புக்கிருந்து சீர்த்த முலைபற்றிவாங்கக்
குடம்நிறைக்கும் வள்ளல் பெரும்பசுக்கள்
நீங்காத செல்வம் நிறைந்தேலோ ரெம்பாவாய்.
பொருள்-
மூன்று உலகத்தையும் தன் காலால் அளந்த
திருவிக்கிரமனின் நாமங்களைப் பாடி
நாம் நோம்பிற்கு நீராடினால்
நாடு முழுவதும் தீமை இல்லாமல்
மாதம் மூன்று முறை மழை பெய்யும்
(அதனால்)செந்நெல் வளர,
நடுவே கயல் மீன்கள் துள்ளி விளையாடும்.
அழகிய நெய்தல் பூக்களில் வண்டுகள் உறங்கிக்கிடக்கும்.
பருத்த முலைகளைப் பற்றி இழுக்க இழுக்க அசையாமல் நின்று
வள்ளல்களை போல் பால் குடங்களை நிரப்பும் பசுக்கள் இருக்க
குறைவற்ற செல்வம் நிறைந்திருக்கும்.
நன்றி- தேசிகன் வீட்டுப் பக்கம் வாரீகளா?

அனுமன் ஜெயந்தி

விக்ருதி ஆண்டு, மார்கழி மாதம் 28 ம் நாள் செவ்வாய்க் கிழமை அனுமன் ஜெயந்தி வந்துள்ளது. [ 04 - 01- 2011]

சிரஞ்சீவி அனுமான் வாயு தேவனுக்கும் அஞ்சனா தேவிக்கும் மார்கழி மாதம் மூல நட்சத்திரத்தில் மகனாக பிறந்தார். அஞ்சனாதேவியின் மகன் என்பதால் அஞ்சநேயர் என்று அழைக்கப்படுகிறார்.

எங்கெல்லாம் ராமநாமம் சொல்லப்படுகிறதோ, எங்கெல்லாம் ராமனின்வரலாறு பேசப்படுகிறதோ அங்கெல்லாம் ஆனந்தக் கண்ணீருடன் அனுமன் மெய்சிலிர்த்தபடி கேட்டுக் கொண்டிருப்பார் என்பது ஐதீகம்.

அதனால், ராமாயணத்தைப் பாராயணம் செய்பவர்கள் அனுமனுக்கு தனியாக ஒரு மணையை (பலகை) போடுவர். கண்ணுக்கு புலனாகாமல் சூட்சும உடலுடன் அனுமன் அந்த மணையில் அமர்ந்து ராமநாமத்தைக் கேட்பார்.

ராமாவதாரம் முடிந்து அனைவரையும் வைகுண்டத்திற்கு அனுப்பி தானும் கிளம்பினார் ராமர். ஆனால், ராமநாமம் ஒலிக்காத வைகுண்டத்திற்குச் செல்ல விரும்பாமல் பூலோகத்திலேயே இருந்து ராமநாமத்தை ஜெபிப்பது என்று தீர்மானித்தார் அனுமன். ராமபிரானும், ""ராமாயணமும், ராமநாமமும் இவ்வுலகில் இருக்கும்வரை என்றென்றும் நீ சிரஞ்சீவியாக இருப்பாயாக! என்று வாழ்த்தி வைகுண்டம் கிளம்பினார்.

அனுமான் ஜெயந்தி விரதம் இருப்பவர்கள் அதிகாலை குளித்து உணவு அருந்தாமல் ஆஞ்சநேயர் கோவிலுக்கு சென்று துளசியால் அர்ச்சனை செய்ய வேண்டும். ஆஞ்சநேயரை ராம நாமத்தால் சேவிப்பதோடு வடை மாலை சாத்தி, வெற்றிலை மாலை அணிவித்து, வெண்ணை சாத்தி வழிபடவேண்டும்.

வடை மாலை சாற்றுவது ஏன்?

சாப்பிட அடம் பிடிக்கும் குழந்தைகளுக்கு நிலாவைக் காட்டி சோறு ஊட்டுவது நம் நாட்டில் காலங்காலமாகவே வரும் ஒரு பழக்கம்.

சாதாரண குழந்தைகளுக்கு நிலா விளையாட்டுப் பொருள் என்றால், ராமதூதனான அனுமனுக்கு சூரியன் விளையாட்டுப் பொருள் ஆனது.

பார்ப்பதற்கு ஏதோ ஒரு பழம் போல் காட்சி தந்த சூரியனை அடுத்த கணமே தன் கையில் பிடித்துச் சாப்பிட வேண்டும் என்று தீராத ஆசை ஏற்பட்டது அனுமனுக்கு.
அனுமன் கைக்குழந்தையாக விளையாடிக் கொண்டிருந்தபோது வானத்தில் செக்கச்செவேல் என்று ஒரு பழம் போல் ‘ஜிவுஜிவு’ என்று தோற்றமளித்த சூரியன், அவரை மிகவும் கவர்ந்து விட்டது. மனித வாழ்க்கையின் ஜீவாதாரத்துக்குக் காரணமான சூரியனை, சாப்பிடுவதற்கு உகந்த ஒரு பழம் என்று நினைத்து விட்டார் அனுமன். வாயுபுத்திரன் அல்லவா ? அடுத்த கணமே அது தன் கையில் வந்து விட வேண்டும் என்று விரும்பினார். வாயு வேகத்தில் வானத்தில் பறந்தார். பிறந்து சில நாட்களே ஆன ஒரு பச்சிளங்குழந்தை, சூரியனையே விழுங்குவதற்காக இப்படிப் பறந்து செல்வது கண்டு தேவர்கள் திகைத்தனர். வாயுபுத்திரனின் வேகத்தை எவராலும் தடுக்க முடியவில்லை.
அதே நேரத்தில் ராகு கிரஹமும் சூரியனைப் பிடித்து கிரஹண காலத்தை உண்டுபண்ணுவதற்காக நகர்ந்து கொண்டிருந்தது. ஆனால், அனுமன் சென்ற வேகத்தில் ராகு பகவானால் செல்ல முடியவில்லை. சூரியனைப் பிடிப்பதற்காக நடந்த இந்த ரேசில் அனுமனிடம் ராகு பகவான் தோற்றுப் போனார். இந்த நிகழ்ச்சியின் முடிவாக, அனுமனுக்கு ஒரு அங்கீகாரம் கொடுத்தார் ராகு பகவான். அதாவது, தனக்கு மிகவும் உகந்த தானியமான உளுந்தால் உணவுப் பண்டம் தயாரித்து எவர் ஒருவர் அனுமனை வணங்குகிறாரோ , அவரை எந்தக் காலத்திலும் தான் பீடிப்பதில்லை எனவும், தன்னால் வரும் தோஷங்கள் அனைத்தும் நிவர்த்தி ஆகி விடும் எனவும் ராகு பகவான் அனுமனிடம் தெரிவித்தார். இந்த உணவுப் பண்டம் எப்படி இருக்க வேண்டும் என்றும் ராகு பகவான் அனுமனிடம் சொன்னார். அதாவது தன் உடல் போல் (பாம்பு போல்) வளைந்து இருக்க வேண்டும் எனவும் சொன்னார். அதைதான் உளுந்தினால் ஆன மாலைகளாகத் தயாரித்து அனுமனுக்கு சமர்ப்பிக்கிறோம். ஆக, ராகு தோஷத்தால் பாதிக்கப்பட்டிருப்பவர் உளுந்து தானியத்தால் ஆன வடை மாலைகளை அனுமனுக்குச் சார்த்தி வழிபட்டால், ராகு தோஷம் நிவர்த்தி ஆகி விடும் என்பது ஐதீகம்.

தமிழ்நாட்டில் மட்டும் அன்றி வடநாட்டிலும் அனுமன் ஜெயந்தி வெகு விமர்சையாகக் கொண்டாடப் படுகிறது.
அனுமனுக்குத் தென்னிந்தியாவில் காரமான மிளகு கலந்த வடை மாலை சாற்றுகிறார்கள். வட இந்தியாவிலோ ஜாங்கிரி மாலை சாற்றுகிறார்கள்

ஆஞ்சநேயர் பலருக்கும் இஷ்ட தெய்வமாக இருக்கிறார். எல்லாருமே அவரை வணங்கி அருள் பெறுவோமாக.

திருவெம்பாவை பாடல்கள்

மாணிக்கவாசகர் அருளிய திருவெம்பாவை
பாடல் 1
ஆதியும் அந்தமும் இல்லா அரும்பெருஞ்

சோதியை யாம்பாடக் கேட்டேயும் வாள்தடங்கண்

மாதேவளருதியோ வன்செவியோ நின்செவிதான்
மாதேவன்வார்கழல்கள் வாழ்த்தியவாழ்த்தொலிபோய்
விதிவாய்க் கேட்டலுமே விம்மிவிம்மி மெய்ம்மறந்து
போதார்அமளியின்மேல் நின்றும் புரண்டிங்ஙன்
ஏதேனும் ஆகாள் கிடந்தாள் என்னேஎன்னே
ஈதேஎம்தோழி பரிசேலோ ரெம்பாவாய்.
பொருள்: வாள் போன்ற நீண்ட கண்களையுடைய தோழியே! முதலும் முடிவும் இல்லாத ஒளிவெள்ளமாய் பிரகாசிக்கும் நம் சிவ பெருமான் குறித்து நாங்கள் பாடுவது உன் காதில் கேட்கவில்லையா? செவிடாகி விட்டாயோ? அந்த மகாதேவனின் சிலம்பணிந்த பாதங்களைச் சரணடைவது குறித்து நாங்கள் பாடியது கேட்டு, வீதியில் சென்ற ஒரு பெண் விம்மி விம்மி அழுதாள். பின்னர் தரையில் விழுந்து புரண்டு மூர்ச்சையானாள். ஆனால், நீ உறங்குகிறாயே! பெண்ணே! நீயும் சிவனைப் பாட எழுந்து வருவாயாக!
விளக்கம்: திருவண்ணாமலையில் அண்ணாமலையார் மார்கழி அதிகாலையில் பவனி வருகிறார். அவரைத் தரிசிக்க பெண்கள் காத்து நிற்கிறார்கள். தங்களுக்கு கிடைத்த இந்த நற்பேறு தங்கள் தோழிக்கும் கிடைக்க வேண்டுமென்ற ஆசையில் அவளை எழுப்புகிறார்கள்.

பாடல் 2
பாசம் பரஞ்சோதிக்கென்பாய் இராப்பகல் நாம்
பேசும்போதெப்போது இப்போதார் அமளிக்கே
நேசமும்வைத்தனையோ நேரிழையாய் நேரிழையீர்
சீசிஇவையுஞ் சிலவோ விளையாடி
ஏசும்இடம் ஈதோ விண்ணோர்கள் ஏத்துதற்குக்
கூசும்மலர்ப்பாதம் தந்தருள வந்தருளும்
தேசன் சிவலோகன் தில்லைச் சிற்றம்பலத்துள்
ஈசனார்க் அன்பர் யாம் ஆரேலோர் எம்பாவாய்.
பொருள்: ""அருமையான அணிகலன்களை அணிந்த தோழியே! இராப்பகலாக எங்களுடன் அமர்ந்து பேசும் போது "ஜோதி வடிவான நம் அண்ணாமலையார் மீது நான் கொண்ட பாசம் அளவிடற்கரியது என்று வீரம் பேசினாய். ஆனால், இப்போது நீராட அழைத்தால் வர மறுத்து மலர் பஞ்சணையில் அயர்ந்து உறங்குகிறாய், என்கிறார்கள் தோழிகள். உறங்குபவள் எழுந்து, ""தோழியரே! சீச்சி! இது என்ன பேச்சு! ஏதோ கண்ணயர்ந்து விட்டேன் என்பதற்காக இப்படியா கேலி பேசுவது? என்றாள். அவளுக்கு பதிலளித்த தோழியர்,""கண்களை கூசச்செய்யும் பிரகாசமான திருவடிகளைக் கொண்ட சிவபெருமானை வழிபட தேவர்களே முயற்சிக்கிறார்கள். ஆனால், அவர்களால் முடியவில்லை. நமக்கோ, நம் வீட்டு முன்பே தரிசனம் தர வந்து கொண்டிருக்கிறான். அவன் சிவலோகத்தில் வாழ்பவன், திருச்சிற்றம்பலமாகிய சிதம்பரத்தில் நடனம் புரிபவன். நம்மைத் தேடி வருபவன் மீது நாம் எவ்வளவு தூரம் பாசம் வைக்க வேண்டும், நீயே புரிந்து கொள்வாயாக என்றனர்.
விளக்கம்: தேவலோகத்தில் சிவபவனி கிடையாது. அவர்கள் சிவனைக் காண வேண்டுமானால் தவம் முதலான கடும் பயிற்சிகளை மேற்கொள்ள வேண்டியிருக்கும். ஆனால், நம் ஊரிலோ ஆண்டுதோறும் திருவிழா. சுவாமி வாசல் தேடி பவனி வருவார். இவ்வளவு அருகில் இறைவன் இருந்தும், அதையும் பார்க்க மறுத்தால் எப்படி என்பது இப்பாடலின் உட்கருத்து.

பாடல் 3
முத்தன்ன வெண்நகையாய் முன்வந்து எதிர் எழுந்தன்
அத்தன் ஆனந்தன் அமுதனென்ற உள்ளுறித்
தித்திக்கப் பேசுவாய் வந்துன் கடை திறவாய்
பத்துடையீர் ஈசன் பழஅடியீர் பாங்குடையீர்
புத்தடியோம் புன்மை தீர்த்தாட் கொண்டாற் பொல்லாதே
எத்தோ நின் அன்புடமை எல்லோம் அறியோமே
சித்தம் அழகியார் பாடாரோ நம் சிவனை
இத்தனையும் வேண்டும் நமக்கேலோர் எம்பாவாய்

பொருள்: முத்துப்பற்கள் தெரிய சிரித்து எங்களை மயக்குபவளே! கடந்த ஆண்டுகளில், நாங்கள் வந்து எழுப்பும் முன்னதாக நீயே தயாராக இருப்பாய். சிவனே என் தலைவன் என்றும், இன்ப வடிவினன் என்றும், இனிமையானவன் என்றும் தித்திக்க தித்திக்க அவன் புகழ் பேசுவாய். ஆனால், இப்போது இவ்வளவு நேரம் எழுப்பியும் எழ மறுக்கிறாய். கதவைத் திற, என்கிறார்கள்.தூங்கிக் கொண்டிருந்த தோழி, ""ஏதோ தெரியாத்தனமாக தூங்கி விட்டேன். அதற்காக, என்னிடம் கடுமையாகப் பேச ÷வண்டுமா? இறைவனின் மேல் பற்றுடைய பழமையான அடியவர்கள் நீங்கள். உங்களைப் போல் எனக்கு இந்த விரதமிருந்ததில் அனுபவமில்லை. மேலும், பக்திக்கு நான் புதியவள். என் தவறைப் பெரிதுபடுத்துகிறீர்களே! என வருந்திச் சொல்கிறாள்.வந்த தோழியர் அவளிடம், ""அப்படியில்லையடி! இறைவன் மீது நீ வைத்துள்ளது தூய்மையான அன்பென்பதும், தூய்மையான மனம் படைத்தவர்களாலேயே சிவபெருமானை பாட முடியும் என்பதும் எங்களுக்குத் தெரியும். நீ சீக்கிரம் எழ வேண்டும் என்பதாலேயே அவசரப்படுத்துகிறோம், என்றனர்.
விளக்கம்: ஒருநாள் கோயிலுக்கு போவது, ஆண்டவனை விழுந்து விழுந்து வணங்குவது, மறுநாள் ஏதோ விரக்தியில் அல்லது எதிர்பார்ப்பு நிறை வேறாமல் போனதும் அவனை வணங்குவதை விட்டுவிடுவது...இதெல்லாம் நிஜ பக்தியாக முடியாது என்பதே இந்தப் பாடல் உணர்த்தும் கருத்து.

திருவெம்பாவை

மணிக்கவாசகப் பெருமானால் பாடப்பட்ட திருவெம்பாவைப் பாடல்கள், தோழியர் ஒருவரை ஒருவர் துயில் நீங்கி எழுமாறு அழைக்கும் பாடல்கள் ஆகும். மார்கழித் திருவாதிரை நட்சத்திரத்திற்கு முந்திய ஒன்பது தினங்களும் திருவெம்பாவைக் காலமாகும்.இக்காலத்தில் அதிகாலையிலே எல்லாக் கோயில்களிலும் அபிஷேகம், பூஜை என்பன நடைபெறுகின்றன. அதன் பின்னர் திருவெம்பாவைப் பாடல்கள் பாடப்பட்டு ஒவ்வொரு பாடல் முடிவிலும் சுவாமிக்கு நைவேத்தியம் செய்து கற்பூர ஆராத்தி காண்பிக்கப்படுகின்றது.திருவெம்பாவையின் கடைசித் தினம் திருவாதிரையாகும்.
திருவெம்பாவை என்பது திருவாதவூரர் என்னும் மாணிக்கவாசக சுவாமிகள் அருளிச் செய்துள்ள திருவாசகத்தில் நடுநாயகமாகத் திகழும் ஒரு பகுதியாகும்.ஒவ்வொரு பாடலும் ஏலோரெம்பாவாய் என முடியும் இருபது பாடல்கள் கொண்டது. சைவ மரபினர் அனைவர் வீடுகளிலும் ஒவ்வோர் ஆண்டிலும் மார்கழி வைகறைப் பொழுதில் பக்தியுடன் ஓதப்பெறுவது.

ஆண்டாள் கிளி

ஆண்டாளின் கரத்தில் அமர்ந்துள்ள கிளி 'சுகப்பிரம்மர்' ஆவார். ரங்க நாதரிடம் அவரை ஆண்டாள் கிளி ரூபத்தில் தூது அனுப்பினாளாம் ஆண்டாள். தூது சென்று வந்த அவரிடம் 'உனக்கு என்ன வரம் வேண்டும்' என்று கேட்க, இதே கிளி ரூபத்தில் உங்கள் கரத்தில் அமர்ந்திருக்க வேண்டும் என்றாராம். அவர் விரும்பியபடி ஆசிர்வதித்தாராம் ஆண்டாள்.

செங்கோல் ஏந்தி அரசாளும் மதுரை ஸ்ரீமீனாட்சிக்கு வலத் தோளில் கிளி. அன்பால் இறையாட்சி புரியும் ஸ்ரீஆண்டாளுக்கு இடத் தோளில் கிளி.

இதைப் பிரசாதமாகப் பெறுவோர் பெரும் பாக்கியசாலிகள்.

இந்தக் கிளி தினமும் ஸ்ரீவில்லிப்புத்தூர்கோவிலில் புதிதாகச் செய்யப்படுகிறது.

கிளி மூக்கு- மாதுளம் பூ;

மரவல்லி இலை- கிளியின் உடல்;

இறக்கைகள்- நந்தியாவட்டை இலையும் பனை ஓலையும்;

கிளியின் வால் பகுதிக்கு வெள்ளை அரளி மற்றும் செவ்வரளி மொட்டுகள்; கட்டுவதற்கு வாழை நார்;

கிளியின் கண்களுக்கு காக்காய்ப் பொன்.

இப்படித் தயாராகிறது ஆண்டாள் கிளி.

இந்தக் கிளியை உருவாக்க ஐந்து மணி நேரம் தேவைப்படுகிறது.

திருவண்ணாமலை

இறைவர் திருப்பெயர் : அருணாசலேஸ்வரர், அண்ணாமலையார். 


இறைவியார் திருப்பெயர் : அபீதகுஜாம்பாள், உண்ணாமுலை.

தல மரம்   : மகிழம்

தீர்த்தம்    : பிரம தீர்த்தம் 

வழிபட்டோர்   : விசுவாமித்திரர், பதஞ்சலி, 

வியாக்ரபாதர்,  அகத்தியர், சனந்தனர் ஆகியோர். 

• பஞ்சபூத தலங்களுள் நெருப்புக்குரிய தலம்
• இங்கு மலையே இறைவனின் சொரூபம்.
• வல்லாள மன்னனுக்கு மகனாக வந்தவதரித்து 
• இறைவன் அருள் செய்த பதி இதுவே.

அருணாச்சலேஸ்வரர் கோவில் தமிழகத்தில் 


திருவண்ணாமலை மாவட்டத்தில் அமைந்துள்ளது.


 பஞ்சபூதஸ்தலங்களுள் இந்தக் கோவிலும் ஒன்று. 


பஞ்ச பூதங்களுள் ஒன்றான நெருப்பை குறிக்கிறது . 


நினைத்தாலே முக்தி தரும் தலம்,


 அடி முடி காணா அண்ணாமலை, 


பஞ்ச பூதத் தலங்களில் அக்னித் தலம், 


ஆறு ஆதாரத் தலங்களில் மணிபூராகத் தலம், 


இந்தியாவின் 2-வது பெரிய ராஜகோபுரம், 


பிரம்மா, விஷ்ணுவின் அகந்தையை அடக்க 


சிவன் ஜோதி ரூபம் எடுத்த தலம், 


பிரம்மாவும், விஷ்ணுவும் சிவனை 


வேண்டித் தவமிருந்த தலம், 


அம்மனுக்கு இடபாகத்தை அளித்து 


அர்த்தநாரீஸ்வரராக சிவன் காட்சியளித்த தலம், 


அருணகிரிநாதர் முக்தியடைந்த தலம், 


திருப்புகழின் முதல் பாடல் பாடப்பட்ட தலம் 


என்று நீளமான பெருமைப் பட்டியலைக் கொண்டு விளங்குகிறது.


பிரம்மாவும், விஷ்ணுவும் 


சிவனின் அடி, முடியைக் காணச் செல்லும் போது 


அவர் ஜோதி ரூபமாகக் காட்சியளிக்கிறார். 


அப்போது திருவண்ணாமலையில்


 லிங்கோத்பவர் உருவானது. 


இதனால் சைவத்தின் முதல் தலமாக 


திருவண்ணாமலை போற்றப்படுகிறது.

திருவண்ணாமலையை ஆட்சி செய்த 

வள்ளால மகாராஜா குழந்தைப் பேறு இல்லாமல் 

இறைவனை நோக்கித் தவமிருந்ததால் 

இறைவனே அவருக்குக் குழந்தையாகப் பிறந்ததாக 

தல வரலாறு கூறுகிறது.

இதனால் குழந்தைப் பேறு வேண்டுபவர்கள், 

வேண்டுதல் நிறைவேறிய பிறகு 

கார்த்திகை தேர்த் திருவிழா அன்றும்,

 5-ம் திருவிழா அன்றும், 

திருவூடல் திருவிழா அன்றும் 

கரும்பில் தொட்டில் செய்து, 

அத்தொட்டிலில் குழந்தையை வைத்து 

கோயிலை வலம் வந்து 

பிராத்தனையை நிறைவேற்றுகின்றனர்.

வள்ளால மகாராஜா இறந்த பிறகு 

இறைவனே ஈமக்கிரியைகளைச் செய்ததால் 

இக்கோயிலில் மோட்ச தீபமிடுவதும் 

சிறப்பு வாய்ந்ததாகும்.

அதே போல் இக்கோயிலில் ஸ்ரீ ரமண மகரிஷி 

தவமிருந்த பாதாள லிங்கமும் சிறப்பு வாய்ந்தது.

இங்கு இருக்கும் சிவபெருமான் 


அருணாச்சலேஸ்வரர் அல்லது 


அண்ணாமலையார் என்றும், 


துணைவியார் உண்ணாமலை என்றும் 


அழைக்கப்படுகின்றனர்.  

மொத்தம் 24 ஏக்கர் பரப்பளவில் அமைந்துள்ளது .  


கிட்டத்தட்ட 2000 ஆண்டுகளுக்கு முன்னரே இருந்திருக்கலாம் 


என்று வரலாற்றுச் சான்றுகள் கூறுகின்றன.

இக்கோவிலில் உள்ள ஆயிரம்கால் மண்டபத்தையும்,

சிவகங்கை குளத்தையும் கிருஷ்ணதேவராயரும்,

 கிளி கோபுரத்தை [கி.பி 1053 ] ராஜேந்திர சோழனும்,

 பிரம்ம தீர்த்தத்தை [கி.பி 1230] வேணுதாயனும்,

வள்ளால கோபுரத்தை [கி.பி 1320] வள்ளால மஹாராஜாவும்

 கட்டியுள்ளனர்.

இக்கோவில் உருவாக குலோத்துங்கன், ராஜேந்திரசோழன்,

கோப்பெரும்சிங்கன், ஆதித்ய சோழன், மங்கையர்க்கரசி,

விக்கிரம பாண்டியன், அம்மானை அம்மாள் ஆகியோரும்

காரணமாக இருந்துள்ளனர்.

சேர, சோழ, பாண்டியர்களால் உருவாக்கப்பட்ட

 பெருமைக்குரியது இந்த திருவண்ணாமலை.

பின்னர் 19 மற்றும் இருபதாம் நூற்றாண்டுகளில் 

பல நகராத்தார்களினால் இந்தக் கோவில் புதுப்பிக்கப்பட்டு

 1903, 1944, 1976, 2002 ஆகிய ஆண்டுகளில் 

கும்பாபிஷேகமும் நடைபெற்றது. 

பெரிய மலைக்கு நடுவே மொத்தம் ஆறு பிரகாரங்களும், 

ஒன்பது கோபுரங்களுடனும் பிரமாண்டமாய் காட்சியளிக்கிறது. 

கோவிலின் உள்ளே நுழைவதற்கு நான்கு கோபுரங்களும், 

கோவிலின் உள்ளே ஐந்து கோபுரங்களும் உள்ளன. 

கோவிலின் பிரதான கோபுரமான 

கிழக்கு கோபுரம் 217 அடி உயரமும் 

11 அடுக்குகளையும் கொண்டது.

கிழக்குக் கோபுரம் தமிழகத்திலேயே உயர்ந்து விளங்குகிறது. 

தெற்கு கோபுரம் - திருமஞ்சன கோபுரம், 

மேலக்கோபுரம் - பேய்க் கோபுரம், 

வடக்குக் கோபுரம் - அம்மணியம்மாள் கோபுரம் 

என்றழைக்கப்படுகிறது.

அருணாசலப் பெருமான், 

தங்கக் கவச நாகாபரணத்துடன் வைர விபூதி

 நெற்றிப்பட்டம் ஜொலிக்க காட்சித் தருகிறார்.

கோவிலின் உள்ளே சிவகங்கை தீர்த்தம், பிரம்ம தீர்த்தம்

 என இரண்டு குளங்களையும் காணலாம்.  

முதல் பிரகாரம்:

கோவிலின் முக்கிய கடவுளான அருணாச்சலேஸ்வரை 

இங்கு தரிசிக்கவேண்டும். 

இங்கிருந்து மூன்றாம் பிரகாரத்தில் அமைந்துள்ள 

உண்ணாமுலை அம்மனை தரிசிக்கவும் வழி உள்ளது. 

இரண்டாம் பிரகாரம்:

அறுபத்தி மூவர், சோமாஸ்கந்தர், வேணுகோபாலர், 

ஆறுமுகர், லிங்கோத்பவர், தக்ஷிணாமூர்த்தி,

 பைரவர், கஜலக்ஷ்மி, நடராஜர்,

 துர்கை, சண்டிகேஸ்வரர் ஆகிய தெய்வங்களையும் 

இரண்டாம் பிரகாரத்தில் வணங்கலாம். 

பள்ளியறையும் இந்த பிரகாரத்தில் உள்ளது. 

மூன்றாம் பிரகாரம்:

கிளி கோபுரம், தீப தரிசன மண்டபம், சம்பந்த விநாயகர், 

ஸ்தல விருட்சமான மகிழ மரம், கல்யாண மண்டபம், வசந்த மண்டபம், 

காலத்தீஸ்வரர் சந்நிதி, யாகசாலை, பிடாரி அம்மன சந்நிதி, 

கல்லால் ஆன திரிசூலம் ஆகியவைகளையும், 

சிதம்பரம் சிதம்பரேஸ்வரர், திருவானைக்காவல் ஜம்புகேஸ்வரர், 

காஞ்சிபுரம் ஏகாம்பரேஸ்வரர் சந்நிதிகளையும் 

மூன்றாம் பிரகாரத்தில் காணலாம். 

நான்காம் பிரகாரம்:

கால பைரவர் சந்நிதி, பிரம்ம தீர்த்தம், புரவி மண்டபம்,

சக்தி விலாசம், கருணை இல்லம்,

பிரம்ம தீர்த்தத்திற்கு அருகில் பிரம்ம லிங்கம்,

வித்யாதரேஸ்வரர் லிங்கம், விநாயகர், நலேஸ்வர லிங்கம்,

யானை திரை கொண்ட விநாயகர்,  பிச்சை இளையனார்

ஆகியவற்றை கண்டுகளிக்கலாம். 

ஐந்தாம் பிரகாரம்:

 கம்பத்து இளையனார் சந்நிதி, ஆயிரம் கால் மண்டபம்,

 ஸ்ரீபாத லிங்கம், சிவகங்கை தீர்த்தம், விநாயகர் சந்நிதி, 

அருணகிரிநாதர் மண்டபம், வள்ளால மஹாராஜ கோபுரம் 

ஆகியவற்றை காணலாம். 

ஆறாம் பிரகாரம்:

கோவிலின் உள்ளெ நுழைவதற்கான

 நான்கு கோபுரங்கள் உள்ளன.

கிரிவலம்: 

இங்கு உள்ள 2668 அடி உயர மலை லிங்கம் போல் காட்சிதருகிறது. 

 மலையின் கீழ்த்திசையில் இருந்து பார்த்தால் ஒன்றாகவும், 

சுற்றும் வழியில் இரண்டாகவும், 

மேற்கு திசையில் மூன்றாகவும், 

முடிவில் ஐந்து முகங்களாகவும் காட்சி தருகிறது. 

மலையை சுற்றி வருவதால் 

நிறைய பயன்கள் இருப்பதாக நம்பப்படுகிறது. 

பெளர்ணமி நாட்களில் நிலவின் ஒளி 

மலையில் இருக்கும் மூலிகைச் செடிகள்மீது 

பட்டு பிரதிபலிக்கும். 

அப்படி பிரதிபலிக்கும் ஓளிக்கதிர்கள்

 நம் உடலுக்கும் உள்ளத்திற்கும் நன்மை பயக்கும். 

எனவே பெளர்ணமி நாளில் கிரிவலம் வருவது சிறப்பு. 

14 கி.மீ நீளமுடைய கிரிவலப் பாதையில் 

இந்திர லிங்கம், அக்னி லிங்கம், யம லிங்கம், 

நிருத்தி லிங்கம், வருண லிங்கம், வாயு லிங்கம், 

குபேர லிங்கம், ஈசான்ய லிங்கம் 

ஆகிய எட்டு லிங்கங்கள் எட்டுத் திசைகளிலும் உள்ளன. 

மாணிக்கவாசகரை சிறப்பிக்கும் வகையில் 

கிரிவலப் பாதையில் அடி அண்ணாமலையில் 

ஒரு கோவிலையும் காணலாம்.  

இரவில் கிரிவலம் செல்ல பாதை முழுவதும் விளக்குகளும் உள்ளன.

புத்தாண்டே வருக!!!

இனிய புத்தாண்டு நல்வாழ்த்துக்கள்

மனித நேயம், அன்பு, கருணை, பணிவு, அடக்கம் ஆகியவை மனதில் கொண்டு,

செல்வமும், செல்வாக்கும், ஆரோக்கியமும், மன அமைதியும் பெற்று அனைவரும் இந்த ஆண்டில் நலமுடன் வாழ எல்லாம் வல்ல இறைவனை உளமார பிரார்த்திப்போம்.

நம் நாடும், வீடும் செழிக்கட்டும்.

மனிதம் வளரட்டும்.

வளங்கள் பெருகட்டும்.

ஒற்றுமை ஓங்கட்டும்.